:::::::: NAMA KAMPUNG NYENG BROBAH:::::::::::

:::::::: NAMA KAMPUNG NYENG BROBAH:::::::::::

Pada kata mulanya pasti “pulau”. Pulau bagi umumnya di Indonesia pasti daratan nyeng ada di tengah-tengah aer laut. Tapi bagi orang Bekasi Pulau adalah kampung kecil nyeng ada di tengah-tengah sawah nyeng luas ngampar.
Tapi itu kata “pulau” grobah pelan-pelan jadi kata “pulo”. Mangkanya di Bekasi, kalu ada kampung pulo, maka asal mu’asalnya itu kampung adanya di tengah-tengah tegalan sawah. Jangan arep Pulo di Bekasi ada pantai-nya.
Biasanya jalan nyeng ngarah ke kampung itu cumen galengan-galengan sawah nyeng lebarnya kaga lebih dari setengah meter.
Banyak banget kampung Pulo di Bekasi dan Betawi. Sebut aja dah PULOGADUNG. Dan PULOGEBANG di Betawi.
Di Bekasi ada PULO ASEM, PULO DAMAR, PULOKUKUN, PULOSIRIH, PULOPUTER, PULOTIMAHA.
Kaga bareng sembagenya, Teluk juga ora ada lautnya. Au dari mana asal mu’asalnya sebutan “Teluk” jadi “Plok”.
Teluk Buyung, kaga ada hubungananah ama orang dari Minangkabo. Sebutannya Plokbuyung.
Alkisah dulunya mah Kampung Ujung Malang. Tapi oleh Almaghfurlah Baba Kiayi Haji Nur’Ali semasa hidupnya pengen kampung kelahirannya ada pengen mbawa keberkahan. Maka dientoglah pada satu acara mulidan di satu musolla. “ Kampung ini namanya kudu robah dari UJUNG MALANG jadi UJUNG HARAPAN. Semoga dengen perobahan ini banyak pengharepan kita bakal jadi nyata di kumdian hari, “ demikian kata pemuka agama pemuka masyarakat Bekasi ini.
Kampung berikutnya adalah Kampung LOKOMOTIP nyeng awalnya bernama Kampung KOKOKBELUK. Sebab arti kata kokokbeluk adalah nama semacem jin setan marakayangan. Tapi penulis ge’ kaga paham kalu dirobah jadi Lokomotip. Mumkin lokomotip artinya nyeng ngebawa di depan, atawa penuntun jalan, atawa kendaraan nyeng paling keker. Syahdan nyeng mula-mulain namain itu juga penulis kaga tau. Apakah Aji Baihaki Bin Haji Ahmad Itiyyah, atawa Haji Hidayatulloh Bin Haji Abdul Jalil, atawa mungkin juga kesepaketan dari beberapa orang termuka.
Kampung Rawa, tau-tau sekarang namanya nambah jadi Kampung “Rawa Silam Indah”. Di Kampung ini emang banyak tokoh-tokoh masyarakat. Ada Baba Aji Uho Suhendi, orang Cianjur nyeng punya bini orang situ asli, nyeng udah kedagingan tinggal di Rawa Silem. Ada Mamanda Haji Muhtadi Bin Haji Rinjan, sembage tokoh pendidikan. Ada pula Baba Haji Muhammad Ri’an. Ada juga Kakanda Haji Mawardi Espedeh, nyeng mimpin sekolahan. Mumkin orang-orang besar ini bermipakat supaya nama kampungnya diganti, biar punya masa depan kali ya ! Tapi baguslah, nama RAWA SILAM INDAH tentu jauh jauh lebih indah ketimbang KAMPUNG RAWA.
Pada mulanya Kampung Kaliabang Nangka Kidul. Tapi kerna kampungnya rada mencil alias nyeglik dekdewek, maka Baba Haji Komarudin, Baba Haji Jenal Aripin ama Baba Haji Madinah Bin Haji Anwar suatu kutika berempug mu ada niat ngrobah dia punya kampung. Tau dari mana mereka puny aide dinamailah itu Kampung “TEGAL MERINTIS”. Emang sih kaya kaya Kampungnya Ki Lurah Semar Kudapawana. Bang Edi Supriyatna Bin Haji Komar menampik “ Bagen dah nama itu nyeng nyohor, daripada kaga diakuin’” tangkisnya.
Begitupun Kampung Kaliabang Tengah Kidul, namanya berobah menjadi Kaliabang Jalan Lori. Mumkin kerna dulunya di sekitar situ ada bekas jalan lori (kereta dorong peninggalan jaman penjajahan). Itu juga apa kata Tuan Syafrudin Bin Muh Tibuh, atawa kata Haji Nurdin Bin Haji Muh Soleh. Atawa mumkin juga idenya Ustadz Haji Abdul Manap Bin Haji Matnur. Tapi “Alhamdulillah” semoga semuanya ngebawa kebarokahan. Amin.

(Nyeng Nulis Kong Guntur Elmogas)